Ons groet Juffrou Maryke...

Maryke kom al 'n hele tydjie saam met Madeliefie en sy verlaat ons darem nie heeltemal nie! Sy gaan nogsteeds deel wees van Geleenthede en ook agter die skerms uithelp!

Caroline het vir Juffrou Maryke 'n paar vrae gevra:

Wat is jou hoogtepunt by Madeliefie?

Soos baie van julle weet, is ek al betrokke by Madeliefie van die beginjare af... ek was weg vir 'n tydjie, maar my pad het weer met Madeliefie gekruis en ek is so dankbaar hiervoor. Vir my was daar baie hoogtepunte... om te sien hoe ons gegroei het van 4 kindertjies tot nou met in die 40, is 'n absolute blessing! Hoe ons van elke geleentheid 'n sukses gemaak het: spesiale dae, konserte, Mnr&Mej, ons eerste karnaval!

Wat was vir jou spesiaal wat jy altyd sal onthou?

Wat vir my spesiaal was is dat ons nie net Juffrouens was wat saamgewerk het nie, maar ook vriende wat na ure saam kan kuier en gesels. Vriendskappe wat by Madeliefie begin het... Elke vriendskap wat ek met my kollegas opgebou het, is iets wat ek vir altyd sal onthou...

Dan natuurlik ook my kinders in my klas (en in die res van Madeliefie) wat ek altyd sal onthou... van hulle was klein gewees toe ek daar begin het en nou is hulle al hul eie mens met hul eie persoonlikheid! Ook hoe van hulle ontwikkel het, kinders wat te bang was om iets te probeer en nou is hulle voor in die ry as 'n nuwe aktiwiteit begin. Om te sien hoe kinder floreer, is die beste gevoel en maak mens se hart vol!

Wat het jy geleer in jou tyd hier by Madeliefie?

'n Mens kan so baie by kinders leer. 'n Mens is so geneig om te ver in die toekoms te dink... kinders lewe vir vandag. Mens moet elke dag leef asof dit jou laaste is. Lewe kan in 'n oogwink verander. Ek het ook geleer om soms na die lewe deur die oë van 'n kind te sien. Raak opgewonde oor klein dingetjies... verstaan dat hulle, net soos jy ook aandag wil hê, ook aanvaar wil word en ook belangrik geag wil word.

Watter snaakse insident sal jy altyd onthou?

Ons Juffrouens het al 'n paar snaakse ge-val-le gehad... ek inkluis... 'n mens lag mos altyd wanneer jy nie eintlik moet nie. Dan is daar ook 'n sekere kollega wat uit die kleinste blikkie in 'n bondel energie kan verander. Ons het ook al 'n paar taalblapse onder mekaar gehad... en partykeer hoor mens iets heeltemal anders as wat gesê word... Ek sal die gesigte van Juffrouens onthou, wanneer hulle gesels-gesels inkom en besef my tafel staan nie waar hy die oggend nog gestaan het nie... ja, ek het my klas amper maandeliks geskuif, die kinders was mal daaroor om elke maand 'n nuwe klas te kry!

Ek sal verseker die gelag (soms dat die trane loop) mis...

“There is nothing in the world so irresistibly contagious as laughter and good humor.”

Hoe lyk jou pad vorentoe, wat wag vir jou?

Wel, ek gaan nogsteeds by Madeliefie uithelp en agter die skerms dingetjies doen... maar ek het 'n hele rukkie terug my eie besigheid begin waar ek skryfbehoeftes vir kinderpartytjies en troues ontwerp... Ek hoop dat die besigheid nog groter sal groei en dat dit 'n groter sukses sal word. Julle kan op Facebook gaan loer as julle dalk nuuskierig is, of my website gaan besoek.

Wat is jou boodskap vir Madeliefie?

My boodskap vir julle, is ook my Madeliefie Vers vir 2018:

My seun, moenie vergeet wat ek jou geleer het nie. Hou vas aan my opdragte. Dit sal jou lank laat lewe en jou ’n voorspoedige lewe gee. Moenie dat jy tekort skiet aan liefde en getrouheid nie. Koester dit soos iets waardevols wat jy om jou nek dra. Skryf dit op die tafel van jou hart. Jy sal guns en ’n goeie naam verkry by God en by mense. Vertrou op die Here met alles wat jy het. Moenie staatmaak op jou eie insigte nie. Vra na die wil van God in alles wat jy doen. Hy sal die regte pad vir jou wys. [Spreuke 3:1-12]

#Juffrou #Maryke #reënboogklassie